Mipalag si Lanao del Sur Rep. Zia Alonto Adiong sa mga alegasyon nga nakadawat siya og maletang puno sa kuwarta ug giingong dili magkatugma ang timeline sa maong mga sumbong sa iyang kahimtang isip miyembro sa House of Representatives.
Gipadayag ni Rep. Adiong nga dugay na niyang wala tagda ang mga alegasyon bisan pa nga migawas na ang iyang ngalan pipila ka bulan na ang milabay.
Matud pa sa kongresista, walay basehan ang alegasyon nga nakadawat siya og kuwarta niadtong 2023 tungod kay bag-o pa lamang siya nga nahimong kongresista niadtong 2022 ug wala pa gani siya makadawat og chairmanship sa House niadtong panahona.
Dugang pa niini, iyang giingon nga wala usab motakdo ang timeline sa alegasyon sa pagsugod sa mga imbestigasyon ug kontrobersiya nga may kalabutan sa flood control projects ug sa mga kalihokan sa Quad Committee nga nagsugod lamang sa ulahing bahin sa 2024.
Gipadayag usab ni Rep. Adiong nga adunay mga dili magkasinabtan nga detalye sa listahan sa mga giingong nakadawat og maleta, lakip na ang pag-apil sa ngalan ni Mamamayang Liberal Party-list Rep. Leila De Lima nga, sumala kaniya, anaa pa sa detensyon sa panahong giingong nahitabo ang insidente. Gihisgutan usab niya ang paglakip sa ngalan ni Terry Ridon nga wala kuno maapil sa unang listahan nga migawas.
Matud pa ni Rep. Adiong, dili usab motakdo ang alegasyon sa giingong flood control kickback tungod kay wala pa man matud niya nagsugod ang maong isyu niadtong 2023 ug nalambigit lamang kini sa mas ulahing mga budget allocations.
Tungod niini, naghain siya og libel ug cyberlibel complaints batok sa 18 ka bagmen nga giila sa mga report nga kanhing bodyguards ni kanhing kongresista Zaldy Co. Giingon niya nga dili angay pasagdan ang mga alegasyon nga walay ebidensya ug kinahanglan adunay legal nga sangputanan ang mga nagpasaka niini.
Sa kasamtangan, nagsilbi usab si Rep. Adiong isip lead trial ug prosecution spokesperson sa House of Representatives alang sa impeachment proceedings batok kang VP Sara Duterte. Giingon niya nga seryoso ang maong alegasyon tungod kay makadaot kini sa reputasyon sa mga tawo ug mahimo kunong masuta pinaagi sa mga CCTV system sulod sa House of Representatives kon adunay kamatuoran ang mga giingong panghitabo.
