Gipunting sa lokal nga panggamhanan sa Davao City ang pagpalambo sa usa ka permanenteng pasilidad nga magsilbing opisina, workspace ug community center alang sa mga Senior Citizens ug Persons with Disabilities (PWDs).
Kabahin niini, gipahigayon ang Joint Committee Meeting niadtong Nobyembre 2026 aron hisgutan ug hatagan og pinal nga pag-apruba ang gisugyot nga building nga gitumong nga mahimong sentro sa mga serbisyo ug kalihokan alang sa maong sektor.
Mitambong sa panagtigom sila Councilor Doc Enzo Villafuerte, Councilor Atty. J. Melchor Quitain Jr., OSCA Head Lorenzo C. Borja ug PDAO Head Atty. Redendo E. Martinez aron hisgutan ang mga detalye ug pagpalambo sa proyekto.
Pinaagi sa maong pasilidad, gitinguha nga mahatagan ang mga senior citizens ug PWDs og mas angay ug permanenteng lugar diin mahimo nilang ma-access ang nagkadaiyang serbisyo, programa ug suporta sa lokal nga panggamhanan.
Gilauman usab nga mahimong venue ang maong building alang sa ilang mga kalihokan, konsultasyon ug panagtigom, nga makatabang sa pagpalig-on sa ilang panaghiusa ug aktibong partisipasyon sa komunidad.
Lakip kini sa mga lakang nga nagtumong sa pagpalapad sa access sa serbisyo ug paghatag og mas inklusibong luna alang sa mga senior citizens ug persons with disabilities sa Davao City.
