Nagpasidaan ang Department of Education (DepEd) sa mga magtutudlo nga mosulay sa pagbaligya o pagprenda sa bag-ong mga laptop nga gipang-apod-apod ngadto kanila.
Matod ni DepEd Secretary Sonny Angara, adunay hugot nga mga lakang sa pagpanalipod nga gipahimutang ang departamento aron masiguro nga dili magamit sa ilegal nga mga kalihokan o sa laing katuyoan ang maong mga laptop.
Ang maong pahimangno gisundan sa pagsugod sa DepEd sa pag-apod-apod sa mokabat sa 231,000 ka laptop ngadto sa mga magtutudlo sa tibuok nasud.
Gidugang sa kalihim nga dili mahimong ibaligya ang maong mga kagamitan tungod kay kabtangan kini sa gobyerno.
Matag eskwelahan adunay property custodian nga responsable sa pagbantay sa imbentaryo ug pagsiguro nga husto ang paggamit sa mga laptop.
Una nang gipahibalo sa DepEd nga nakapalit kini og 231,725 ka laptop alang sa mga magtutudlo.
Sa maong gidaghanon, 169,008 ang MacBook Neo units samtang 62,717 ang Windows-based laptops.
Dugang pa niini, makadawat usab og 3,646 ka MacBook Neo ang mga administrative officer sa DepEd.
