Nasikop sa kapulisan ang 44-anyos nga si Julius Pesi Colano, alyas “Ker,” atol sa buy-bust operation sa Purok Talakitok, Barangay Dawis, Digos City, Davao del Sur, pasado ala-una sa kaadlawon karong Nobyembre 17, 2026.
Gipahigayon ang operasyon sa mga personnel sa Digos City Police Station, kauban ang PDEA Davao del Sur, PDEU/PIU ug 1st Davao del Sur Provincial Mobile Force Company, ubos sa koordinasyon sa PDEA.
Narekober gikan sa suspek ang upat ka heat-sealed plastic sachet nga adunay gituohang shabu, lakip ang usa ka buy-bust item ug tulo ka sachet nga giklasipikar isip possession items. Mitimbang kini og 3.69 gramos ug adunay standard drug price nga 25,092 pesos.
Nakuha usab sa operasyon ang 1,000-peso nga buy-bust money, usa ka cellphone, coin purse ug 50-peso nga papel nga kwarta.
Giatubang ni Colano ang kaso tungod sa paglapas sa Republic Act 9165 o Comprehensive Dangerous Drugs Act of 2002. Gimarkahan ug gi-inventory sa lugar ang mga ebidensya atubangan sa mga giimbitar nga saksi ug sa suspek, subay sa gitakdang pamaagi sa balaod.











