Nagpagula ang Korte Suprema og show cause order batok kang Quezon City 4th District Representative Bong Suntay ug Atty. Ferdinand Topacio tungod sa giingong malaw-ay nilang mga pahayag sa actress nga si Anne Curtis ug sa igsuon niini nga si Jasmine Curtis.
Gimandoan sa Supreme Court sila Suntay ug Topacio nga mopasabot nganong dili sila angayng masilotan og disbarment.
Matud sa SC, nahimong kontrobersyal ang pahayag ni Suntay kaniadtong Marso 3, 2026 atol sa iyang manifestation sa pagdungog sa House Committee on Justice kabahin sa impeachment complaint batok kang Vice President Sara Duterte.
Gibatikos usab ang mga pahayag ni Topacio sa iyang programa sa radyo kaniadtong Marso 5, 2026, human niyang hisgutan ang isyu ug ang duha ka mag-igsuong aktres.
Gitakda sa resolusyon sa Korte Suprema nga adunay 10 ka adlaw sila Suntay ug Topacio gikan sa pagdawat sa show cause order aron mosumite sa ilang komento.
Gitahasan usab ang Office of the Bar Confidant sa pagsumite sa updated nga listahan sa mga pending administrative cases batok kang Suntay ug Topacio. Samtang, magsumite usab ang Integrated Bar of the Philippines (IBP) og status report kabahin sa maong kaso.
Wala pa sa pagkakaron mopagawas og tubag sila Suntay ug Topacio bahin sa show cause order sa Korte Suprema.
