DAVAO CITY – Ginasayran pa sa Police Regional Office XI ug Davao City Police Office ang lugar nga gitaguan sa gipangita gihapon nga si KOJC leader Pastor Apollo Quiboloy nga kasamtangang nag-atubang og kontrobersya kalabot sa human trafficking ug pagpangabusong sekswal.
Gikanayon sa tigpamaba sa DCPO nga si Police Capt. Hazel Tuazon nga nagpaabot pa sila sa kopya sa arrest order gikan sa Senado, ingon man ang koordinasyon gikan sa sergeant at arms sa Senado aron maaksyonan ang maong butang.
Una nang niingon si Tuazon nga kinahanglang makig-alayon ang sergeant at arms sa Senado sa lokal nga kapolisan aron malikayan ang posibleng kaguliyang atol sa pagsilbi sa arrest order, tungod sa daghanang supporters sab ni Quibuloy.
Una nang gibarugan ni PRO XI spokesperson Police Major Catherine Dela Rey nga andam silang ipatuman ang arrest order.
Samtang wala pay pamahayag si Davao City Mayor Sebastian “Baste” Duterte mahitungod sa arrest order nga gipaguwa batok kang Quibuloy.
Kahinumduman nga nagmando ang Senado sa nakalabayng semana sa pagdakop ug pagtanggong sa televangelist alang sa iyang padayon nga pag-snub sa mga pagdungog sa kamara sa giingong mga kaso sa human trafficking ug sexual abuse, nga ang uban niini anaa na karon sa mga lokal nga korte.
