DAVAO CITY – Dungan sa paghinumdom sa Semana santa, subli nga gipahinumduman sa kapulisan ang publiko nga hugtanon nga gidili ang pagdala-dala ug mahait nga butang, armas ug uban pang mga butang nga mamahimong makapabutang sa risgo.
Dili sumala pa magpanuko ang kapulisan sa pagsikop sa mga indibidwal nga magmagahi ug dili mutamod sa mga polisiya.
Una ng gibutyag ni Davao City Police Office (DCPO) spokesperson Police Major Maria Teresita Gaspan nga andam na karon ang kapulisan sa mga aktibidad sa simbahan diin kinahanglan visible ang otoridad sa mga nagkadaiyang area ilabi na sa mga dapit diin ipahigayon ang religious activities sama sa station of the cross, Visita Iglesia, ug mga prusisyon diin sa kasamtangan gitugtan na ang full capacity sa mga simbahan.
Gipahimangnoan sab nila ang publiko nga bisan hugtanon ang gipatuman nga seguridad sa mga entry points, ilabi na sa mga simbahan ug nagapahigayon ug inspeksiyon sa mga mamimbahay, kinahanglan nga magbinantayon pa gihapon sa mga kawatan nga sagad mugara panahon nga adunay mga aktibidad nga dagsaon sa mga tawo.
Sagad sab sumala pa nga taas ang kaso sa lungkab hinungdan nga mas maayo sumala pa nga adunay usa ka miyembro sa pamilya nga mabilin sa panimalay aron nga dili makapahimulos ang mga kawatan.
Hinuon aduna sab matud pay mga kapulisan nga ipakatag sa mga subdivision arun nga magpahigayon ug pagpatrolya ug pagpangronda.
Sa pikas nga bahin, una na sab nga gibutyag ni Davao City Covid-19 Task Force Spokesperson Dr. Michelle Schlosser nga dili nila mamahimong pugngan ang mga aktibidad sa simbahan nga sagad sagdaon sa mga tawo hinungdan nga nagpahimangno na lamang kini sa katawhan nga dili kalimtan ang pagsuot ug facemask ilabi na nga delikado ang mga panagtapok nga gigikanan sa pagtakud-takod sa kagaw.
