DAVAO CITY – Gibutyag sa Department of Health (DOH)-Davao nga aduna pa gihapoy 1,069,299 ka mga indibidwal sa rehiyon nga dili bakunado.
Subay sa datus sa milabay nga Abril 18, nakatala ang rehiyon ug fully vaccinated nga 3,048,570 ka mga indibidwal o 69.3 percent sa target population nga anaa sa 4,397,683.
Makita sa nahisgutan nga numero ang dyutay nga slim margin ngadto sa 3,328,384 ka mga indibidwal nga nakadawat na sa ilang first dose.
Bugtong 424,084 ka mga indibidwal o 9.6 percent ang nakadawat na sa ilang booster o dugang nga dose.
Gani, nakab-ot na matud pa karon sa dakbayan ang 84.6 percent alang sa fully vaccinated samtang 86.6 percent ang nakadawat sa ilang first dose pa lamang.
Nakadawat sab sumala pa karon ang siyudad ug minimal takers alang sa booster shot nga anaa lamang sa 242,414 ka mga indibidwal gikan sa 1,531,004 target nga mabakunahan niini.
Sa tibuok Davao Region, ang Davao Oriental province ug Davao del Norte ang mipakita ug taas nga percentage alang sa fully vaccinated uban ang 66.1 percent ug 66.8 percent.
Misunod niini ang Davao de Oro nga anaa sa 58.4 percent fully vaccinated.
Nakab-ot sab sa siyudad ang 56.4 percent alang sa fully vaccinated samtang sa Davao Occidental misaka kini sa51.4 percent.
Sa mga munisipalidad sa rehiyon, ang Talaingod sa Davao del Norte adunay 63.9 percent unvaccinated gikan sa 23,340 target population, Jose Abad Santos sa Davao Occidental adunay 53.6 percent unvaccinated gikan sa 67,468 target population samtang ang Pantukan sa Davao de Oro adunay 47 percent unvaccinated gikan sa 74,086 target population.
