Gisusi sa Senate Impeachment Court ang kapin ₱2.1 milyones nga giingong nadawat ni Vice President Sara Duterte gikan sa GenCorp Industries, Inc. sulod sa upat ka tuig isip return of capital o pagbalik sa puhunan.
Atol sa pagdungog kaniadtong Miyerkules, Nobyembre 11, 2026 gikumpirma ni Atty. Suzette Balucanag-Punay, in-house counsel sa GenCorp ug Metro City Chow Foods Corporation, nga mikabat sa ₱2,142,369.14 ang kinatibuk-ang kantidad nga gipagawas alang kang Duterte gikan sa 2022 hangtod 2025, base sa corporate records sa kompanya.
Matod ni Punay, gikan kini sa loose investment sa Bise Presidente sa Jollibee Times Square branch sa Davao City. Ang puhunan unang gibutang sa Davao Bounty Times Food Corporation sa wala pa gigamit sa operasyon sa maong sangay.
Apan, gikuwestiyon ni Senate impeachment court presiding officer Francis “Chiz” Escudero kon giunsa pagkab-ot sa kapin ₱2.1 milyones ang gibalik nga puhunan, nga ikonsiderar nga ₱46,875 lamang ang naunang natala nga capital contribution ni Duterte sa Davao Bounty Times Food Corporation.
Giangkon ni Punay nga wala siyay nakitang sinulat nga dokumento nga makapamatuod sa eksaktong kantidad sa orihinal nga puhunan. Wala usab niya mapatin-aw ang basehan sa pag-abot sa maong kantidad nga gibayad kang Duterte.
Gikuwestiyon usab ni Senator-judge Sherwin Gatchalian kon nganong GenCorp ang nagpagawas sa kuwarta alang sa puhunan ni Duterte imbes ang mga kompanyang unang nalambigit sa operasyon sa Jollibee Times Square branch.
Dugang niini, gipangutana ni Gatchalian ang posibleng panagbangi sa interes, ilabina kay nakadawat ang GenCorp og mga kontrata gikan sa Davao City government nga mikabat sa ₱33 milyones, bisan pa nga maoy nagpagawas sa bayad nga giingong pagbalik sa puhunan sa Bise Presidente.
Samtang, gipasiugda ni Punay nga dili stockholder sa GenCorp si Duterte ug wala kini makadawat og dividends gikan sa kompanya. Apan gikumpirma niya nga nakadawat ang Bise Presidente og kuwarta gikan sa GenCorp isip giingong pagbalik sa iyang puhunan.
