Gitinguha sa Wellness Tourism Association of the Philippines nga mapalig-on ang wellness tourism sa nasod pinaagi sa pagpasiugda niini atol sa umaabot nga 49th ASEAN Summit.
Sumala kang Wellness Tourism Association of the Philippines Secretary-General Cybille Barcebal, dakong oportunidad ang maong kalihokan aron maila sa tibuok kalibotan ang tradisyonal nga pamaagi sa pag-atiman sa panglawas nga anaa sa Pilipinas, ilabi na ang traditional hilot.
Gusto sa asosasyon nga masaksihan mismo sa mga delegado, langyaw nga dignitaryo ug mga lider sa ASEAN ang kahibalo ug kahanas sa mga Pilipino sa maong natad.
Dugang pa ni Barcebal, dili lamang kultura sa nasod ang mapaila pinaagi niini, kondili makatabang usab sa pagmugna og dugang trabaho ug mas maayong panginabuhian alang sa mga mamumuo sa turismo ug wellness sector.
Tumong sa asosasyon nga pinaagi sa maong internasyonal nga plataporma, makadawat og mas dakong pag-ila ug oportunidad ang mga lokal nga eksperto sa tradisyonal nga pamaagi sa wellness.
