Nag-atubang og preliminary investigation ang upat ka kongresista sa Office of the Ombudsman kalabot sa giingong iregularidad sa mga proyekto sa flood control sa Pilipinas.
Sumala kang Ombudsman Jesus Crispin Remulla, mokabat na sa 79 ka kaso ang nalambigit sa maong mga proyekto, diin 25 niini ang anaa sa preliminary investigation.
Matod ni Remulla, upat ka kongresista ang dugang nga giimbestigahan ug naghulat na lang sa pagsaka sa pormal nga kaso batok kanila.
Gipadayag usab niya nga adunay duha ka non-bailable nga kaso sa plunder ug 22 ka kaso sa malversation of public funds o pagwaldas sa pondo sa gobyerno. Dili usab mapiyansahan ang maong mga kaso tungod kay milapas sa ₱8.8 milyones ang kantidad nga nalambigit.
Dugang pa niini, adunay 55 ka kaso sa paglapas sa Republic Act 3019 o Anti-Graft and Corrupt Practices Act.
Gibanabana nga mokabat sa ₱10.78 bilyones ang kantidad nga nalambigit sa mga kaso, diin matod ni Remulla, aduna na silay ebidensiya nga naglangkob sa maong kantidad.
