Giduso ni Senador Panfilo “Ping” Lacson ang pagbutang og opisyal nga transcript ug padayon nga livestream sa mga pagdungog sa bicameral conference committee o Bicam aron masubay sa publiko ang mga kausaban sa gisugyot nga 2027 national budget.
Sumala kang Lacson, importante nga adunay opisyal nga rekord sa mga panaghisgot aron klarong matino kung kinsang mga senador ang misugyot og mga amyenda ug kinsay nagduso sa pagbalhin o realignment sa mga pondo ug probisyon sa badyet.
Dugang pa niya, dugay nang walay opisyal nga transcript ang mga pagdungog sa Bicam. Busa, gawas sa livestreaming, gisugyot usab niya nga ipatik sa website sa Senado ang mga rekord sa deliberasyon aron masuta sa publiko ang mga pagbag-o sa panukalang budget.
Plano usab ni Lacson nga dapiton sa mga pagdungog ang mga civil society group aron magsilbing mga tigbantay batok sa posibleng pag-abuso sa proseso.
Gihangyo usab niya ang maong mga grupo nga dili lamang magmonitor sa mga panaghisgot, kondili ibutyag sa publiko ang mga kuwestiyonableng lakang aron mapanubag ang mga posibleng nalambigit niini.
