Posibling hingpit nga makuhaan og lisensya sa pagmaneho ang kanhing Mayor human sa viral nga video sa social media diin giingong iyang gipadagan ang usa ka gas attendant nga wala mabayri ang gasolina sa daplin sa Maharlika Highway sa Allacapan, Cagayan.
Sumala sa Land Transportation Office (LTO), giandam na ang lifetime revocation sa driver’s license sa maong kanhing opisyal ug pagbutang og “alarm” status sa iyang sakyanan aron dili na kini magamit.
Gikabutyag nga nagpakarga og gasolina ang wala panganling Mayor apan wala kini mobayad sa wala pa mibiya ug dayon mipadagan sa sakyanan, hinungdan nga gigukod kini sa pump attendant nga miyembro sa usa ka Indigenous Peoples (IP) community.
Samtang gibutyag usab sa kanhing Mayor nga ang insidente nga nakuhaan og video gikan sa passenger seat sa iyang sakyanan, usa sumala pa ka vlog content.
Tungod niini, gikondena sa LTO ang gihimo sa kanhing opisyal ug miingon nga dili angay himuong content ang usa ka sitwasyon nga delikado ug makapaubos sa ubang tawo.
Gawas pa niini, migawas usab sa imbestigasyon nga posible nga iya sa kanhing Mayor ang gasolinahan diin nahitabo ang insidente.
Nagpagawas na usab ang LTO og show cause order batok kaniya, sa driver, ug sa rehistradong tag-iya sa sakyanan.
Gipangayoan sila og pasabot kon nganong dili sila kasuhan og reckless driving ug ideklarang dili angay magmaneho.
Samtang nagpadayon ang imbestigasyon, gimandoan usab ang driver nga i-surrender ang iyang lisensya nga anaa karon sa 90 ka adlaw nga preventive suspension.
