Gipaila sa Miss Universe Organization niadtong Biyernes ang bag-ong korona nga isul-ob sa modaog sa ika-75 nga edisyon sa Miss Universe.
Ginganlan og “The Radiance of an Eternal Legacy,” gipakita ang nagasidlak nga korona atol sa panagtigom sa mga delegado sa Miss Universe 2026 nga gihimo sa San Juan, Puerto Rico.
Lakip sa mitambong sa maong panagtigom isip delegado ang pambato sa Pilipinas nga si Bea Millan-Windorski.
Gama sa 18-karat white gold ug gidayandayanan og 3,150 ka diyamante ang maong korona, nga gidisenyo sa iladong magbubuhat og alahas nga si George Wittels ug sa Maison d’OR, usa ka kompanya sa alahas nga nakabase sa Paris.
Gikuha ang disenyo niini gikan sa panulondon nga gipamana sa mga kanhing modaog sa Miss Universe sulod sa miaging 75 ka tuig, diin gipasiugda ang matag mahinungdanong hugna sa kasaysayan sa maong kompetisyon.
Sa likod nga bahin sa korona, giporma ang mga alahas sa numero nga “75,” samtang tulo ka dagkong diyamante sa atubangan ang nagsimbolo sa kagahapon, karon ug kaugmaon sa maong kompetisyon.
Ang diyamante sa wala nagrepresentar sa mga kababayen-an nga mipukan sa mga babag ug naghatag og dalan alang sa sunod nga henerasyon.
Ang diyamante sa tuo nga bahin naghulagway sa mga kababayen-an nga nahimong ehemplo sa pagdala og kausaban sa ilang tagsa-tagsa ka komunidad.
Samtang ang diyamante sa tunga nagsimbolo sa mga kababayen-an nga magpadayon sa pagdala sa panulondon sa Miss Universe sa umaabot.
Sa pagkakaron, nagkadool na ang pinakadakong bahin sa Miss Universe 2026 nga ipahigayon sa Nobyembre 24, diin nagpaabot ang tanan kung kinsa sa mga delegado ang makasul-ob sa bag-ong korona.
