Gidawat sa Davao City Jail Male Dormitory ang 543 ka sako sa bugas gikan sa National Food Authority (NFA) isip kabahin sa Person Deprived of Liberty (PDL) Rice Subsidy Program niining Nobyembre 2026.
Nagkantidad og ₱868,800 ang maong suplay sa bugas nga gipagahin sa lokal nga panggamhanan sa Davao City aron makatabang sa pagtagbo sa panginahanglan sa pagkaon sa mga persons deprived of liberty o PDL.
Pormal kining gidawat sa Bureau of Jail Management and Penology (BJMP) Davao City Jail Male Dormitory ubos sa pagpangulo ni JSUPT Kaye G. Del Rosario. Pinaagi sa maong programa, gipalig-on ang koordinasyon tali sa lokal nga panggamhanan ug sa BJMP sa paghatag og suporta sa mga PDL, ilabina sa ilang nag-unang panginahanglan samtang anaa sa kustodiya sa gobyerno.
Kabahin kini sa paningkamot sa pagseguro nga mahatagan og igong pagkaon ang mga PDL ug mapadayon ang ilang kaayohan sulod sa pasilidad.
Gilauman nga pinaagi sa maong tabang, mas masuportahan ang adlaw-adlaw nga panginahanglan sa mga persons deprived of liberty sa Davao City Jail Male Dormitory.
