Ipatawag ni Davao City Councilor Enzo Villafuerte, proponent sa Davao City Anti-Bullying Ordinance, ang City Anti-Bullying Council aron repasohon ang pagpatuman sa ordinansa human sa bag-ong insidente sa bullying sa Ateneo de Davao University.
Gidawat ni Villafuerte ang aksyon sa unibersidad nga pagtangtang sa estudyanteng responsable sa pagpangulata human sa ilang imbestigasyon ug pagpatuman sa due process. Apan gipunting sa konsehal nga dili lamang ang silot sa nakasala ang angay tutokan, kondili ang pagpugong nga dili na mausab ang susamang insidente sa Ateneo o sa ubang eskwelahan sa Davao City.
Matod niya, kinahanglan kining mahimong pahimangno sa tanang institusyong pang-edukasyon ug ahensya sa gobyerno nga palig-onon ang preventive measures, reporting mechanisms, intervention protocols ug support systems alang sa mga estudyanteng makasinati og bullying.
Lakip sa iyang gustong repasohon ang proseso sa pagdawat og reklamo, pagpanalipod sa biktima batok sa dugang kadaot o pagpanghulga, imbestigasyon sa mga kaso ug paghatag sa angay nga interbensyon. Gipasiugda ni Villafuerte nga dili angay nga molihok lamang ang mga eskwelahan ug ahensya kon nahitabo na ang bullying, hinunoa kinahanglan adunay klaro ug epektibong mga lakang aron mapugngan kini.
Pinaagi sa pagrepaso, gilauman nga matino ang mga kakulangan sa kasamtangang pagpatuman sa ordinansa ug mapalig-on ang koordinasyon tali sa mga eskwelahan, City Anti-Bullying Council ug mga hingtungdang ahensya. Tumong niini nga masiguro nga adunay klarong mekanismo sa pagresponde sa mga reklamo ug mapanalipdan ang mga estudyante batok sa tanang porma sa bullying.
