Giabli na kagahapong adlawa, Agosto 10, ang Kadayawan Floriculture Trade Fair nga gipasiugdahan sa Floriculture Industry Development Inc. o FIDI sa Davao Coastal Road.
Naghiusa sa maong kalihokan ang mga nagkalain-laing klase sa matahom nga mga bulak, ornamental plants ug lokal nga produkto sa floriculture industry sa Davao.
Gitumong sa trade fair nga ipakita sa publiko ang nagkadaiyang bulak ug tanom nga gipatubo ug gibaligya sa mga lokal nga mag-uuma ug negosyante isip kabahin sa pagsaulog sa Kadayawan Festival.
Dugang pa niini, nahimo usab kining higayon aron masuportahan ang mga lokal nga naglihok sa floriculture ug mapalambo pa ang industriya sa mga bulak ug ornamental plants sa dakbayan.
Magpadayon ang Kadayawan Floriculture Trade Fair hangtod Agosto 23, 2026, diin giimbitar ang publiko nga mobisita ug makakita sa nagkalain-laing klase sa bulak, tanom ug uban pang produkto sa lokal nga floriculture industry.
Gilauman nga dugang kalingawan ug kolor usab kini sa mga kalihokan sa Kadayawan karong tuiga. | VIA BOMBO EROS PAJOTA
