Posibleng mosaka ang inflation sa nasud tali sa 5.0 hangtod 6.0% karong tuiga tungod sa taas nga presyo sa lana, kakulang sa suplay sa pagkaon, ug mga “second-round effects” nga nagpasamot sa pagsaka sa presyo, sumala sa usa ka kanhing opisyal sa Bangko Sentral ng Pilipinas (BSP).
Matod ni GlobalSource Partners economist ug kanhing BSP deputy governor nga si Diwa Guinigundo, mosulod ang Pilipinas sa mas delikadong hugna sa inflation, diin gikan sa temporaryong supply shocks mahimong padayon ug lig-on nga cycle sa inflation.
Bag-uhay lamang nga mikabat na sa 4.1% ang inflation niadtong Marso, mas taas kini kung itandi sa 2.4% niadtong Pebrero ug labaw pa sa doble kung itandi sa miaging tuig, nga nagpasabot sa nagkataas nga pressure sa presyo.
Giangkon sa BSP ang risgo ug gipataas ang ilahang projection sa inflation karong tuiga gikan sa 3.6% ug 3.2% ngadto sa 5.1% ug 3.8%.
Dugang pa ni Guinigundo, ang taas nga presyo sa lana sa global nga merkado, limitado nga suplay sa pagkaon sa lokal, ug second-round effects sama sa pangayo og taas nga sweldo ug pag-adjust sa pamasahe ug utilities mao ang nagduso sa mas padayon nga inflation.
Matod pa, maapektuhan usab ang pagtubo sa ekonomiya tungod kay moubos ang purchasing power sa mga panimalay. Sa pagbana-bana sa GlobalSource Partners, posible nga mohinay og 0.5 hangtod 1.5 puntos ang gross domestic product growth gikan sa baseline nga 5% kung magpadayon ang krisis.
Gibutyag usab ni Guinigundo nga igo na ang posibleng pagsaka sa policy rate og 25 hangtod 50 basis points, uban ang klarong forward guidance, basta magpabilin ang kredibilidad sa polisiya.
