Gibarugan sa National Bureau of Investigation (NBI) nga legal ang posibleng pagpatuman sa warrant of arrest batok kang Senador Jinggoy Estrada bisan pa kon anaa kini sulod sa Senado sa higayon nga makagawas na ang maong mando gikan sa korte.
Matud ni NBI Director Atty. Melvin Matibag, ilang gibase ang ilang baruganan sa nangaging sitwasyon nga may kalabutan sa pagselbi sa warrant of arrest nga gi-isyu sa International Criminal Court batok kang Senador Ronald “Bato” Dela Rosa.
Sumala kaniya, kaniadto miinsistir ang Senado nga dili usa ka lokal nga korte ang ICC ug nga mahimo lamang arestuhon ang senador kung ang warrant maggikan sa usa ka lokal nga hukmanan.
Tungod niini, nagtuo ang NBI nga kon ang warrant of arrest batok kang Senador Estrada ipagawas sa lokal nga korte, legal ang ilang pagpatuman niini bisan pa kon sulod sa Senado kini isilbi.
Gipasalig usab sa NBI nga andam kini sa pagpatuman sa bisan unsang warrant of arrest nga ipadala sa korte ug giingong walay espesyal nga pagtrato nga ihatag kang Estrada.
Gipasabot ni Director Matibag nga pareho lamang ang proseso nga sundon sa NBI sama sa ubang mga tawo nga giisyuhan og warrant of arrest, samtang ang mga medikal nga panginahanglan sa senador mahimong masakop sa hurisdiksyon sa Sandiganbayan.
