Mas mikusog pa ang Bagyong Domeng samtang nagpadayon kini sa paglihok sulod sa Philippine Area of Responsibility (PAR), sumala sa Philippine Atmospheric Geophysical and Astronomical Services Administration.
Sa labing bag-ong tropical cyclone bulletin sa PAGASA, giklasipikar na ang Domeng isip usa ka severe tropical storm. Sa ulahing monitoring, namatikdan ang sentro sa bagyo sa gilay-on nga 95 kilometros sa sidlakan sa Northern Luzon.
Nagdala kini og kusog sa hangin nga moabot sa 95 kilometros matag oras duol sa sentro ug paghaguros ngadto sa 115 kilometros matag oras.
Naglihok kini paingon sa kasadpang amihanan-kasadpan sa gikusgon nga 15 kilometros matag oras.
Bisan og gamay lamang ang posibilidad nga adunay direktang epekto ang Bagyong Domeng sa kahimtang sa panahon sa nasod sulod sa sunod nga 24 oras, gipaabot sa ahensya nga mapakusog niini ang habagat o southwest monsoon.
Tungod niini, posible nga makasinati og kusog nga pag-ulan ang kasadpang bahin sa nasod sugod ugmang adlawa, Mayo 31.
Gilauman usab nga mosamot pa ang kusog sa bagyo ug posible kining mahimong usa ka hingpit nga typhoon sa ulahing bahin sa adlaw.
Apan, gipaklaro sa weather bureau nga wala gilauman nga mag-landfall ang bagyo sa bisan unsang bahin sa Pilipinas.
Padayon nga molihok ang Bagyong Domeng paingon sa amihanang-kasadpan hangtod sa Domingo sa dili pa kini moliko paingon sa habagatang bahin sa Japan sa Lunes, Hunyo 1.
