DAVAO CITY – Nagpadayon ang imbestigasyon sa Hagonoy Municipal Police Station (MPS) mahitungod sa possibleng rason ingon man ang responsableng inahan sa bag-ong himugso nga bata kinsa nakaplagang patay sa usa ka canal sa Purok 8, Barangay Poblacion, Hagonoy, Davao del Sur.
Suma kang Police Major Rhuel Barachina, Acting Chief of Police (ACOP) sa Hagonoy MPS, gibutyag niini nga walay natala sa barangay nga mabdos ug manganakay niadtong higayona, busa usa sa gilantaw karon sa kapulisan nga possibleng gikan sa laing lugar ang bata.
Kini taliwala sa posibilidad nga lapos ra ang dalan sa Hagonoy sa ubang kasikbit nga mga munisipalidad sama sa Kiblawan, Matanao, ug Padada.
Mitambag na lamang ang pulis ngadto sa publiko ilabi na sa mga ginikanan, nga kon dili kaya mabuhi anak, ilabi na kon bag-o pa kining gihimugso, mas maayu nga makig-alayon sa kapulisan o sa Department of Social Welfare and Development (DSWD) aron mahatagan kini og insaktong pag-atiman ingon man aron mapa-adopt.
