Gikansela na ang lisensya sa mga armas nga nakarehistro sa ngalan ni Senador Ronald “Bato” dela Rosa.
Gikumpirma sa PNP-Firearms and Explosives Office (FEO) ang revocation order nga gipirmahan niadtong Mayo 26 nga naglangkob sa type 5 firearms license sa 117 ka armas nga iya ni Dela Rosa.
Base sa maong kamanduan, ang mga lisensya ug rehistro sa armas sa senador kinahanglan dayong itugyan subay sa Section 4 sa Republic Act 10591 o ang Comprehensive Firearms and Ammunition Regulation Act.
Una nang mihangyo ang National Bureau of Investigation (NBI) sa PNP-FEO nga kanselahon ang 117 ka rehistradong armas ni Dela Rosa tungod sa iyang pagka-pugante sa balaod nga nalambigit sa iyang paglikay atol sa protective custody sa Senado samtang adunay aktibong warrant of arrest gikan sa International Criminal Court (ICC).
Lakip sa mga armas nga nakarehistro kang Dela Rosa ug adunay address sa Davao City mao ang semi-automatic ug select-fire rifles, mga variant sa UZI submachine gun, high-powered .338 caliber rifles, battlefield-grade shotguns, ug nagkadaiyang klase sa handguns. Kahinumduman nga giisip si Sen. Dela Rosa nga pugante sa balaod ug “armed and dangerous.”
