DAVAO CITY – Mibalibad ang Integrated Bar of the Philippines (IBP) Davao City chapter sa paghatag kang Peter Joemel Advincula nga nagpailang si alyas Bikoy ug legal nga suporta gikan sa ilang organisasyon.
Kahinumduman nga si Advincula, nga mao sumala pa ang mipaluyo sa video expose nga “Ang Totoong Narcolist,” ang una ng nangayo ug pakitabang sa IBP aron nga pasakahan ang pipila ka mga personalidad nga iyang gihinganlan sa video nga gilangkuban nila ni kanhi presidential aide Christopher “Bong” Go, kanhi Davao City vice mayor Paolo Duterte ug brother-in-law niini nga si Manases Carpio.
Nagpahayag sa ilang kadismaya ang IBP Davao chapter sa ilang central chapter gumikan kay gitugtan niini nga mamahimong staging area ang ilang organisasyon sa nahimong palabas ni alyas Bikoy.
Bisan nga girespeto sa IBP Davao ang lakang sa IBP National nga mo-representa sa pipila ka mga isyu sa nasod, dili sumala pa angayan nga suportahan si alyas Bikoy ilabi na nga giila ang IBP isip usa ka non-partisan organization ug dili angayan nga modawat ug mga isyu nga adunay kalabotan sa politika.
Gibarugan sa IBP Davao nga dili nila i-tolerate ang bisan unsa man nga mga pahayag gikan sa pipila ka mga indibidwal nga mamahimong hinungdan nga masagulan ug politika ang ilang organisasyon.
Samtang gi-awhag sab ni IBP-Davao president Rogelio Largo ang national chapter nga magpahigayon ug fact-check sa mga nahimong pasangil ni “Bikoy.”
