Giisip sa House prosecution panel nga malampuson ang lima ka adlaw nga pre-trial proceedings sa impeachment case batok kang Vice President Sara Duterte, bisan pa sa kapakyasan sa ilang kampo nga maablihan ang kahon gikan sa Bureau of Internal Revenue (BIR) nga posibleng adunay tax records sa Bise Presidente ug sa iyang bana nga si Atty. Manases Carpio.
Matud pa kang lead prosecutor Rep. Gerville Luistro, nakab-ot sa prosekusyon ang ilang pangunang tumong nga matapos dayon ang pre-trial conference ug maandam ang kaso alang sa pagsugod sa impeachment trial.Dugang pa ni Luistro, gisalikway sa ilang kampo ang pipila ka isyu nga gipasaka sa depensa aron dili maapektuhan ang ilang tinguha nga mapaspasan ang proseso sa pre-trial.
Gikanayon usab ni Rep. Joel Chua nga usa sa labing dako nga hagit sa proseso mao ang dili pagsugot sa depensa sa “common markings” para sa parehas nga dokumento, hinungdan nga miabot sa hapit 8,000 ang total markings imbes nga 4,000 lamang.
Sumala sa prosekusyon, kung miuyon pa ang depensa, unta mas mapaspasan ang pagproseso sa mga ebidensya, apan tungod sa kalainan sa ilang pamaagi sa pagmarka,nadugay ang oras sa pre-trial.
Una niini, mipahayag si Atty. Michael Poa, legal counsel ug spokesperson ni VP Sara nga adunay insidente nga nakulangan og usa ka panid sa dokumento ang prosekusyon, hinungdan nga ilang gipili ang lahi nga proseso sa pagmarka sa ilang ebidensya. Apan giingon ni Chua nga usa lamang kini ka isolated incident ug wala nagrepresentar sa tibuok liboan ka dokumento.
Gipaklaro usab ni Rep. Luistro ang gidaghanon sa mga dokumento, ilabina sa mga transaksyon sa Office of the Vice President ug Department of Education nga miabot sa hapit 4,000 ka panid, nga nakaapekto sa proseso sa pag-verify ug pagmarka.
Sa katapusan, nagpasalamat ang House prosecution panel sa impeachment court sa pagpahapsay ug pagpadali sa proseso bisan pa sa kadaghan sa ebidensya nga gikinahanglan susihon, samtang naghulat pa ang duha ka kampo sa pagpagawas sa pre-trial order ug sa pormal nga pagsugod sa impeachment trial sa Hulyo 6, 2026.
