Nakaapekto sa gibanabana-ang 8,000 ka eskwelahan ug 6 milyon ka estudyante sa tibuok nasud ang kusog nga ulan ug pagbaha tungod sa sunod-sunod nga bagyo ug habagat, sumala sa Department of Education.
Lakip sa hinungdan sa lapad nga pagbaha ug landslide ang Tropical Cyclones Luis ug Maymay uban sa gipalig-on nga Southwest Monsoon.
Tungod niini, adunay mga lugar nga nagsuspinde og klase sulod sa pipila ka adlaw, maong kinahanglan bawi-on sa mga eskwelahan ang nawalang adlaw sa pagkat-on.
Matud ni Education Secretary Sonny Angara, tugbang kini og 1/5 sa kinatibuk-ang eskwelahan sa nasud, apan posible pa mosaka ang ihap tungod kay wala pa makompleto ang tanang report.
Gipasabot ni Angara nga adunay igong panahon sa bag-ong three-term academic calendar aron mabawi pa ang mga adlaw nga walay klase.
Sa pinakabag-ong situational report, 217 ka eskwelahan ang gigamit gihapon isip evacuation centers alang sa kapin 6,400 ka pamilya.
Gibanabana usab nga ₱32.69 million ang gikinahanglan sa cleanup ug clearing operations sa 1,157 ka eskwelahan, samtang ₱192.86 million ang kinahanglan alang sa pag-ayo sa 3,936 ka nadaot nga eskwelahan.
Pinakadaghan nga naapektuhan ang Ilocos Region, gisundan sa Central Luzon ug Cordillera Administrative Region.
