Naglaum ang kampo ni Senador Ronald “Bato” Dela Rosa nga aksyunan na sa Korte Suprema ang bag-ong mosyon o manifestation nga ilang gisumite ning milabayng mga adlaw.
Sa eksklusibong pakighinabi sa Bombo Radyo, gipahayag ni Atty. Israelito Torreon, legal counsel sa senador, nga naglaum sila nga molihok na ang korte kalabot sa ilang hangyo.
Gihangyo sa kampo sa senador ang Korte Suprema nga hatagan og pagtagad ug ikonsiderar pag-usab ang ilang naunang hangyo nga may kalabotan sa pag-isyu og Temporary Restraining Order (TRO).
Hinumdoman nga gisalikway sa Korte Suprema ang una nilang manifestation, partikular ang hangyo nga mag-isyu og TRO aron mapugngan ang implementasyon sa arrest warrant gikan sa International Criminal Court (ICC), tungod sa kakulang sa merito.
Apan, tungod sa bag-ong mga panghitabo, lakip na ang gikatahong P50 milyones nga pabuya alang sa pagdakop kang Sen. Dela Rosa, mibalik pag-usab ang iyang kampo sa Korte Suprema.
Pinaagi sa pinakabag-ong manifestation, gihangyo nila ang korte nga balihon ang naunang desisyon ug mag-isyu na og TRO aron mapugngan ang posibleng pagdala sa senador ngadto sa International Tribunal.
Naglaum usab ang kampo nga aksyunan sa Korte Suprema dili lamang ang bag-ong manifestation kondili apil ang ilang nag-unang petisyon nga nagkuwestiyon sa legalidad sa pagdala kang kanhi Presidente Rodrigo Duterte ngadto sa The Hague, Netherlands.
