Giklaro ni kanhing Office of the Vice President special disbursing officer Gina Acosta nga wala niya nakita o nahibal-an nga nakupot ni Vice President Sara Duterte ang kuwarta nga iyang gi-encash sa bangko ug gitugyan kang Col. Dante Lachica.
Atol sa pagpangutana ni Senator-judge Imee Marcos, diretsong mitubag si Acosta og “Wala, Ma’am” sa pangutana kung adunay higayon nga nakita o nahawakan sa Bise Presidente ang maong pondo.
Dugang pa, giingon ni Acosta nga ang iyang nakita lamang nga kahina-hinala sa pipila ka dokumento mao ang mga walay ngalan ug pirma, apan iyang gina-verify kini kang Lachica.
Sa laing bahin, nahimong emosyonal si Acosta sa dihang gipangutana ni Marcos ang kahimtang sa iyang bana nga nagpailalom sa pagtambal sa Davao.
Matod ni Acosta, dili maayo ang kahimtang sa iyang bana, hinungdan nga nabati ang iyang kasubo atol sa hearing.
Sa pagkakaron, padayon ang pagpangutana kang Acosta bahin sa confidential fund transactions sa OVP. | VIA BOMBO EROS PAJOTA
