Gipunting sa Philippines East ASEAN Growth Area (P-EAGA) Environment Cluster ang mga prayoridad sa pagpanalipod sa kinaiyahan ug biodiversity atol sa ilang ikaduhang semester meeting nga gipahigayon Oktubre 6 hangtod 8, 2026, sa El Nido, Palawan.
Gipangulohan ni Regional Executive Director ug Deputy Chairwoman Atty. Ma. Mercedes V. Dumagan ang tigom, diin gisusi ang mga deliverables ubos sa BIMP-EAGA Vision 2035 ug ang mga update gikan sa mga rehiyon nga sakop sa programa, lakip ang Regions IX hangtod XIII, MIMAROPA ug BARMM.
Lakip sa mga importanteng hisgutan ang pagkolekta ug monitoring sa marine debris, pakigtambayayong sa Malaysia ug Indonesia batok sa illegal wildlife trade, rehabilitasyon sa mangrove ug coral reefs, ug pagtukod sa Marine Protected Area Network.
Gihisgutan usab ang Twin Peaks Biodiversity initiative ug ang pagpanalipod sa Turtle Islands Heritage Protected Area isip kabahin sa mas lapad nga paningkamot sa pagpreserbar sa mga importanteng ekosistema.
Nagsilbing 10-year strategic roadmap sa subregion ang BIMP-EAGA Vision 2035, nga nagtinguha sa pagpalig-on sa regional cooperation alang sa environmental sustainability, biodiversity conservation ug inclusive economic growth.
Samtang, ang Pilipinas gikatakdang modumala sa ika-15 nga BIMP-EAGA Environment Cluster Meeting sa ikaduhang quarter sa 2027. Gilauman nga mahimong oportunidad kini aron masusi ang kalamboan sa mga programa ug mapalig-on pa ang kooperasyon sa mga miyembrong rehiyon alang sa hiniusang prayoridad sa kinaiyahan.
