Gipahayag ni House Prosecutor Rep. Terry Ridon nga dili sakop sa subjudice rule ang pahayag ni Prosecution Counsel Atty. Amando Virgil Ligutan nga may kalabotan sa prinsipyo sa balaod bahin sa misleading questions.
Matud ni Ridon, wala kini nagtumong sa bisan unsang partido o merito sa impeachment case, busa iyang giingon nga angay lamang kini ibaliwala sa presiding officer.
Bisan pa niini, gipasabot ni Ridon nga respetado nila ang mahimong desisyon sa Senate Impeachment Court kabahin sa mga pahayag nga gitugotan atol sa paglilitis.
Gipunting usab niya nga importante nga mahatagan og klarong pagsabot ang publiko sa konteksto ug kahulugan sa mga ebidensyang gipresentar sa impeachment trial.
Apan, miingon si Senate Impeachment Court Presiding Officer Sen. Chiz Escudero nga nag-andam na siya og ruling, warning ug order batok sa pipila ka indibidwal nga posibleng nakalapas sa impeachment rules.
Matud ni Escudero, may kalabotan kini sa impeachment rule 18 nga nagdili sa prosecutors, senator-judges, presiding officer ug counsels sa paghatag og public comments o disclosures bahin sa merito sa kaso.
Gisugo usab niya ang clerk of court sa Senate Impeachment Court nga bantayan ang mga pampublikong pahayag sa mga abogado sa prosecution ug defense.
Gihimo niya kini human mireklamo si Lead Defense Counsel Atty. Shiela Sison batok sa social media post ni Ligutan nga may kalabotan sa pahayag ni Defense Counsel Kristine Ferrer bahin sa “misleading questions” atol sa trial.
