Gipangayo sa kampo sa kanhing Presidente Rodrigo Duterte sa International Criminal Court o ICC nga tangtangon ang walo ka dugang nga insidente sa pagpatay nga gilakip sa trial brief sa prosecution.
Matud sa mga abogado ni Duterte nga gipangulohan ni Peter Haynes, ang walo ka insidente gibase sa bag-ong ebidensiya kalabot sa mga biktima, petsa ug lugar nga wala nalakip sa mga kamatuoran nga gikumpirma sa ICC Pre-Trial Chamber alang sa trial kaniadtong Abril.
Sumala pa sa depensa, ang paglakip niini makapalapad sa sakop sa mga kaso ug mahimong mokonsiderar og bag-ong material facts nga wala gikumpirma alang sa paglilitis.
Kung aprobahan ang hangyo, mokabat sa 57 gikan sa 49 ang gidaghanon sa mga alegadong pagpatay nga gilakip sa kaso batok kang Duterte.
Lakip sa walo ka insidente ang unom ubos sa Count 3, nga may kalabotan sa mga alegadong pagpatay atol sa barangay-clearing operations sa Metro Manila, samtang duha ubos sa Count 2 nga may kalabotan sa mga tawo nga giila isip high-value drug targets.
Apan, gisupak sa prosecution ang argumento sa depensa ug miingon nga sakop gihapon sa gikumpirmang charges ang maong mga insidente tungod kay nahitabo kini sulod sa samang panahon ug geographic areas.
Samtang, gimando sa ICC Trial Chamber III nga magpabilin si Duterte sa detention tungod sa giilang risgo nga makalikay siya sa hurisdiksiyon sa korte o makapanghilabot sa mga saksi samtang nagkaduol ang trial.
Gipagawas ang desisyon human sa unang personal nga pag-atubang ni Duterte sa ICC sukad sa iyang pagdakop ug pagbalhin ngadto sa The Hague kaniadtong Marso 2025.
Gisalikway usab sa chamber ang hangyo alang sa temporary release nga gibase sa iyang kahimtang, tungod kay sumala sa mga huwes, walay bag-ong impormasyon gikan sa mga doktor nga makapamatuod nga kinahanglan siyang buhian.
Ubos sa Rome Statute, kinahanglan repasuhon sa ICC matag 120 ka adlaw ang detention sa usa ka akusado aron susihon kon aduna bay kausaban sa mga sirkumstansiya nga naghatag og basehan sa padayong pagkustodiya.
Sa pagkakaron, nag-atubang si Duterte og tulo ka counts of murder isip crimes against humanity may kalabotan sa mga alegadong pagpatay nga konektado sa iyang anti-drug campaign, lakip ang mga insidente panahon sa iyang pagkapresidente ug pagka-mayor sa Davao City.
Gikatakda nga magsugod ang iyang trial sa Nobyembre 30, 2026.
Sa laing bahin, gikanayon sa civil society-led Truth Commission nga ang personal nga pag-atubang ni Duterte sa korte nahimong “glimmer of hope” alang sa mga biktima sa drug war ug ilang mga pamilya.
Nagkanayon si Raul Pangalangan, chair sa Truth Commission ug kanhing ICC judge, nga magpadayon ang ilang paningkamot alang sa hustisya, accountability, healing ug closure bisan pa gawas sa The Hague.
