Mipanaw na ang singer-songwriter nga si Duncan Sheik sa edad nga 56. Gipahibalo sa iyang kampo ang maong balita pinaagi sa pag-post sa iyang litrato sa social media, diin gihulagway usab siya isip usa ka amahan, igsoon ug maayong higala.
Wala maghisgot ang iyang kampo sa hinungdan sa iyang kamatayon. Sumala sa unang mga taho, sulod sa miaging semana balik-balik si Sheik sa pag-adto sa ospital ug nadala usab sa intensive care unit sa usa ka ospital sa New York City.
Misikat ang ngalan ni Sheik niadtong 1996 human niya gipagawas ang iyang self-titled album nga nakab-ot ang gold record status sa Estados Unidos. Lakip sa nahimong bantog niyang kanta ang “Barely Breathing,” nga nakadawat og nominasyon sa Grammy Awards.
Nagpadayon siya sa pagpagawas og mga album sa misunod nga mga tuig, apan wala na kini makab-ot ang sama nga pagkapopular sa iyang unang mga awit.Nakigtambayayong usab siya kang Steven Sater alang sa Broadway rock musical nga “Spring Awakening,” nga nahimong dakong kalampusan sa entablado.
Tungod sa maong produksiyon, nakadaog si Sheik og duha ka Tony Awards alang sa Best Orchestrations ug Best Original Score.Nadungagan pa ang iyang mga pasidungog human siya nakadaog og Grammy Award alang sa Best Musical Show Album pinaagi sa “Spring Awakening.”
Dugang pa, nakatabang ang maong musical sa pagpalambo sa karera nila Lea Michele ug Jonathan Groff, nga sa ulahi nahimong mga prominenteng artista sa “Glee.”
Sa pagkakaron, wala pa magpagawas ang kampo ni Sheik og dugang nga detalye bahin sa iyang pagpanaw.
