Nanawagan ang Commission on Human Rights (CHR) sa gobyerno ug sa tanang sektor niini nga mas palig-onon ang paghatag og pagtagad ug pagpanalipod sa mga bata, subay sa pagsaulog sa National Children’s Month karong Nobyembre.
Sumala sa CHR, kinahanglan masiguro ang kaluwasan sa mga bata pinaagi sa tukmang pagpangandam sa dili pa, panahon ug human sa mga kalamidad o emerhensya.
Gipasiugda usab sa komisyon nga ang pagpanalipod sa mga bata kinahanglang inklusibo ug walay bisan kinsang mabiyaan, ilabina ang mga batang adunay kapansanan.
Nakasentro ang tema karong tuiga sa “Stand Up! Respond and Care: With Prepared Children, the Nation Is Safer,” nga naghatag og prayoridad sa kaluwasan sa mga bata panahon sa nagkalain-laing katalagman sama sa bagyo, baha, linog ug armadong panagbangi.
Nanawagan usab ang komisyon nga palig-onon ang mga lakang sa pagpanalipod sa mga bata batok sa online sexual abuse and exploitation aron masiguro ang ilang kaluwasan, lakip na sa digital nga kalibotan.
