Giklaro sa Department of Trade and Industry (DTI) nga walay ipatuman nga price freeze bisan pa sa deklarasyon sa state of national energy emergency sa nasud.
Sa ilang pahayag, giingon nga nagpabiling lig-on ang suplay ug presyo sa mga batakang palaliton.
Kini human sa pagpagawas sa Executive Order No. 110 nga nagtumong sa pagpanalipod sa lokal nga suplay sa lana taliwala sa tensiyon sa Middle East.
Gipalihok usab sa maong kamanduan ang UPLIFT Program nga maghatag og target nga subsidiya sa sektor sa transportasyon ug agrikultura.
Matud pa sa DTI, ginapugngan na sa gobyerno ang posibleng pagsaka sa presyo pinaagi sa pagmintina nga stable ang kantidad sa mga produktong ginahatod sa merkado.
Nakigpulong usab ang ahensya sa pribadong sektor, lakip ang 21 ka dagkong manufacturers sa essential goods sama sa sardinas, pan, bottled water, instant noodles ug kape, nga misaad nga dili magtaas presyo sulod sa 30 hangtod 60 ka adlaw.
Gipasalig sa DTI nga igo ang imbentaryo sa mga nag-unang produkto base sa ilahang monitoring, ug walay kakulangon nga mahimong hinungdan sa artipisyal nga pagsaka sa presyo.
Padayon usab ang ilahang inspeksyon sa pagsunod sa Suggested Retail Price (SRP), ug ang mga mapamatud-ang nagbuhat og profiteering o hoarding atubangon ang silot.
