Gikumpirma ni Venezuelan National Assembly Chief Jorge Rodriguez nga mikabat na sa 6,125 ang namatay tungod sa duha ka sunod-sunod nga linog nga miigo sa nasud Venezuela kaniadtong Hunyo 24, 2026.
Gipagawas ang pinakabag-ong datos kapin usa ka bulan human miigo ang magnitude 7.2 ug 7.5 nga linog nga nagpahinabo sa pagkahugno sa halos 200 ka mga building, kadaghanan niini nahitabo sa pinakagrabe nga naapektuhang coastal state sa La Guaira.
Gipadayon sa mga rescue team ug mga miyembro sa pamilya ang pagpangita sa mga biktima ug mga minahal sa kinabuhi nga natabonan sa mga nahugno nga mga imprastaktura, samtang hapit 17,000 ka tawo ang nasamdan tungod sa kusog nga pagtay-og sa yuta.
Gipahayag ni La Guaira Governor Jose Alejandro Teran, base sa report sa local media, nga nagpabiling missing ang 1,400 ka tawo human sa katalagman.
Giklasipikar sa mga otoridad ang 190 ka building nga hingpit nga naguba, samtang kapin 6,400 ka istruktura ang giila nga “high-risk” ug kapin 9,800 pa ang gitawag nga “restricted housing” tungod sa hulga niini sa kaluwasan sa mga residente.
Nagpuyo karon sa makeshift shelters ang halos 24,000 ka tawo sa La Guaira ug Caracas human sa mga paglinog.
Gi-aprobahan usab sa mga mambabalaod sa Venezuela ang usa ka balaod aron mapadali ang pag-abang sa mga propeidad ug matabangan ang mga biktima sa linog.
Kinahanglan pa nga pirmahan kini ni Interim Leader Delcy Rodriguez aron mahimong hingpit nga balaod.
