Gimando ni Department of National Defense o DND Secretary Gilberto “Gibo” Teodoro Jr. ang pagpalapad sa Direct Commission Program aron makadani og mas daghang kwalipikadong Filipino professionals nga mahimong kabahin sa Armed Forces of the Philippines.
Tumong sa maong lakang nga mapalig-on ang modernisasyon sa AFP pinaagi sa pagdugang og mga personnel nga adunay kahibalo sa cyber operations, artificial intelligence, engineering, aviation, communications ug uban pang teknikal nga mga larangan.
Gimando usab sa kalihim nga paspasan ang recruitment ug commissioning sa mga kwalipikadong Advance ROTC graduates, ingon man ang paghatag og oportunidad sa mga enlisted personnel nga angayan mapromote base sa ilang katakos.
Lakip usab sa direktiba ang paghimo og merit-based system sa pagkomisyon sa mga personnel ug paghatag og angay nga konsiderasyon sa mga persons with disabilities nga adunay espesyal nga kahanas nga makatampo sa defense sector.
Matud ni Teodoro, importante usab nga adunay angay nga training ug career development program alang sa mga ma-recruit aron mas mapalig-on ang kapabilidad sa militar.
Kabahin ang Expanded Direct Commission Program sa modernization efforts sa AFP ubos sa Comprehensive Archipelagic Defense Concept nga nagtumong sa pagpalig-on sa depensa sa Pilipinas pinaagi sa pagpalambo sa human capital sa sandatahang kusog.
