Gidawat na sa duha ka national high school sa Davao City ang bag-ong mga school building nga gipondohan pinaagi sa Special Education Fund (SEF) aron makatabang sa paghatag og mas maayong pasilidad alang sa mga estudyante.
Lakip niini ang upat ka andana nga building nga adunay 20 ka classroom alang sa Tamugan National High School, ug tulo ka andana nga building nga adunay unom ka classroom alang sa Balah Licosan National High School.
Ang maong mga pasilidad gipatukod pinaagi sa paningkamot sa City Government of Davao ubos sa pagpangulo ni Mayor Sebastian Z. Duterte, sa pakigtambayayong sa Department of Education (DepEd) Davao City.
Pinaagi sa dugang nga mga classroom, gilaoman nga makatabang kini sa pagpakunhod sa kakulang sa mga lawak-klasehanan ug paghatag og mas luwas ug angay nga palibot alang sa pagkat-on sa mga estudyante.
Mitambong usab sa turnover ceremonies si Atty. Antoinette G. Principe, kansang presensya giila sa DepEd Davao City isip pagpakita sa suporta sa pagpauswag sa edukasyon.
Gipasiugda sa DepEd Davao City nga ang maong proyekto nagpakita sa kaimportante sa pagtinabangay sa lokal nga panggamhanan ug sa sektor sa edukasyon aron mapalambo ang mga pasilidad ug kahigayonan sa pagkat-on sa mga estudyante sa siyudad.
