Gipaklaro ni Defense Secretary Gilberto Teodoro Jr. nga wala nagpataka og label ang Department of National Defense sa mga Pilipino base lamang sa ilang mga pagtuo o opinyon, hinunoa nagbase kini sa ginatawag niyang “objective criteria.”
Ang pahayag ni Teodoro misunod human siya gihagit ni Vice President Sara Duterte nga nganlan ang mga opisyal sa gobyerno nga iyang gipasabot nga “pro-China” ug giingnan nga mopahawa kung dili mosuporta sa polisiya sa nasud kabahin sa West Philippine Sea.
Matud ni Teodoro, ang sukdanan sa DND mao kung ang usa ka opisyal sa gobyerno supak ba sa Administrative Order No. 29 ug kung dili ba kini moila sa maong mando.
Dugang pa niya, kinahanglan matuman ang duha ka kondisyon aron maapil sa maong pagtan-aw, ilabina human sa pagsumite sa Pilipinas sa nautical charts alang sa Bajo de Masinloc ug Panatag Shoal.
Giinsistir usab ni Teodoro nga dili trabaho sa DND ang pagmarka o paghukom sa mga indibidwal tungod lang sa ilang political viewpoints. Sama sa red-tagging, dili usab nila ginabuhat ang pag-tag sa mga Pilipino base lamang sa ilang mga pagtuo.
Samtang, gisaway usab ni Davao City 1st District Representative Paolo “Pulong” Duterte ang unang pahayag ni Teodoro, diin iyang giingon nga ang mga napiling opisyal nakakuha sa ilang mandato gikan sa katawhan ug dili gikan sa Defense Secretary.
Giakusahan usab ni Rep. Pulong Duterte si Teodoro nga nagpakita og pagpihig batok sa China ug naghimo kuno og loyalty test sa mga napiling opisyal.
Sa laing bahin, giila sa Malacañang nga “very alarming” ang maong mga pahayag ni Rep. Pulong ug miingon nga nagpatunghag pangutana kabahin sa iyang pagbarog alang sa interes sa Pilipinas.
