Sugdan sa Department of Education o DepEd ang pagpatuman og active-threat drills sa mga tulunghaan sa tibuok nasod sugod Agosto 25. Sulayan pinaagi sa maong pagbansay kung unsa kapaspas makatubag ang mga tulunghaan sa hulga nga hinimo sa tawo, lakip ang hustong pagresponde, pagpahawa sa mga estudyante ngadto sa luwas nga lugar ug paghiusa pag-usab kanila uban sa ilang mga pamilya.
Ipatuman sa maong drill ang mga leksyon nga nakuha gikan sa bag-ohay nga mga insidente sa pagpamusil sa mga tulunghaan sa Tacloban ug Zamboanga City. Sumala pa ni DepEd Undersecretary Malcolm Garma, nahuman na sa kagawaran ang mga protocol nga ipatuman atol sa pagbansay, uban sa Philippine National Police o PNP. Nasulayan na usab ang maong mga protocol sa Manila Science High School isip unang lakang sa pagpangandam alang sa nationwide implementation.
Lakip sa pinakaimportante nga bahin sa drill ang gitawag nga “reunification stage,” diin ang mga estudyante, ginikanan, medical responders ug kapulisan motigom sa gitakdang mga lugar inay nga magtapok-tapok nga walay klarong sistema palibot sa eskwelahan. Gibase sa DepEd ang maong protocol sa assessment nga gihimo human sa pagpamusil sa usa ka eskwelahan sa Tacloban.
Gipunting usab ni Garma nga importante ang pagpangandam, kahandam ug kahibalo sa mga estudyante ug personnel aron mas paspas ug husto ang pagresponde kung adunay mahitabong bayolente.
Sa pagkakaron, gitumong sa DepEd ang Agosto 25 nga drill aron masuta sa mga opisyal sa eskwelahan kung epektibo ba ang mga protocol sa lebel sa eskwelahan ug matino ang mga kakulangan nga kinahanglan sulbaron sa dili pa ipatuman ang sistema sa tibuok nasod.
