Gi-inaugurate sa Davao Light and Power Company Inc. ang San Pedro Substation sa Anflo Industrial Estate o AIE sa Panabo City niadtong Agosto 25, 2026 aron mapalig-on ang suplay sa kuryente sa agro-industrial park.
Adunay initial capacity nga 10 megavolt-amperes o MVA ang substation, nga gituyo aron masuportahan ang power requirements sa mga locator alang sa manufacturing ug uban pang operasyon.
Sa Phase 2 sa proyekto, dugangan pa kini og 33 MVA ug target nga mahuman sa Disyembre 2027.
Sa pagkakompleto, gilauman nga mahimong fully digital ang substation, adunay real-time data transmission ug solar power system alang sa lighting ug uban pang panginahanglan.
Matod ni Damosa Land President Ricardo Lagdameo, importante ang stable ug constant nga power supply aron malikayan ang interruptions sa mga negosyo sulod sa estate.
Ang AIE usa ka 63-hectare Special Economic Zone nga accredited sa Philippine Economic Zone Authority o PEZA. Aduna kini 24 ka locators, occupancy rate nga 85 hangtod 89 porsyento, ug hapit 2,000 ka empleyado.
Lakip sa mga industriya sa lugar ang agro-processing, packaging, warehousing, cold storage ug manufacturing.| VIA BOMBO EROS PAJOTA
