DAVAO CITY – Gipasalig ni Davao de Oro Governor Tyron Uy nga himuon nila ang tanan aron nga dili na madungagan pa ang ihap sa kaso sa Corona virus disease (covid-19) sa ilang lalawigan.
Tipik lamang kini human nga nakumpirma ang unang kaso sa Davao region nga nagikan sa ilang lugar.
Sumala sa opisyal nga nga gi-atiman na karon ang Davao Regional Medical Center (DRMC) ang maong pasyente ug padayon sumala pa kini nga nagpa-alim.
Buot nga ipahibalo ni Governor Uy nga naningkamut ang Provincial Government of Davao de Oro kaabag ang mga municipal local government units, ug Department of Health (DOH) aron lamang mamahimong luwas ang matag usa sa risgo nga dala sa COVID-19.
Sa kasamtangan, suspendido na matud pa ang klase sa mga munisipyo sa lalawigan.
Karong adlawa, tapokon sab nila ang tanan nga mga mayors, municipal health officers, municipal disaster risk reduction and management officers, mga provincial government department heads, hospital chiefs, ug uban pang stakeholders alang sa usa ka Provincial Inter-Agency Task Force COVID Meeting.
Ang maong meeting magobserbar sa tanang protocols sama sa social distancing ug uban pa.
Mihangyo lamang karon ang opisyal nga motamud sa advisories o pahimangno sa mga local government units ug Department of Health sama na lamang sa dili paggawas sa balay, dili mogawas kung dili importante ang lakwon.
Angayan sab sumala pa nga dili moadto sa mga lugar nga daghan ug tawo.
Siguruhon nga limpyo ang lawas.
Batasanon sab ang paghugas sa kamut gamit ang sabon ug alcohol ug kung nakabatin sumala pa ug mga sintomas, moadto gilayon sa pinakaduol nga mga rural health units, barangay health centers, mga ospital ug uban pa.
Mihangyo si Uy nga kinahanglan magtinabangay, magsinabtanay ug ipakita ang bayanihan.
Angayan sab sumala pa nga kanunay nga alekto ug kalmado ug dili kalimtan ang pag-ampo.
