DAVAO CITY – Gikalipay pag-ayo sa Vices Regulation Unit (VRU) ning dakbayan sa Davao ang nahimong kamanduan ni Pangulong Rodrigo Duterte nga kinahanglan pangdakpon kadtong mga manigarilyo sa pampublikong lugar gamit ang Vape.
Sumala pa kang Dr. Ashley Lopez, head sa VRU, dakong tabang ang nahisgutan nga lakang sa pangulo aron nga mapugngan kadtong mga tawo nga nalambigit sa susama nga bisyo nga mohatud sab og kadaut sa panglawas.
Gipasabot ni Lopez nga bisan adunay dyutay nga kalahi-an kini sa regular nga sigarilyo, wala sumala pay kalahian ang dili maayong epekto nga ihatud niini sa panglawas ug gani mamahimong makagasgas sab kini sa tutunlan.
Mas gipahugtan ang kampanya batok Vape human nga adunay usa ka 16 anyos nga dalagita nga nakaangkon ug unang kaso sa lung injury tungod sa paggamit sa e-cigarette.
Samtang gipasalig sab ni Davao City Police Office (DCPO) director Pol. Major Kirby Kraft nga mas pahugtan na sab nila ang pagpanakop sa mga indibidwal nga manigarilyo og vape sa mga pampublikong lugar.
