Magpahigayon karong umaabot nga Domingo, Setyembre 21, 2025, ang “Pray for the Philippines,” usa ka kalihokan nga naghiusa sa paghinumdom sa kasaysayan, pag-ampo alang sa nasud, ug panawagan batok sa korapsyon.
Gilauman nga daghang mga Dabawenyo ang mosalmot, lakip na ang mga supporters ni kanhi Presidente Rodrigo Roa Duterte (DDS).
Gibutyag sa mga Dabawenyo ang kamahinungdanon sa maong kalihokan aron madungog ang tingog sa katawhan ug mapalawom ang panaghiusa alang sa kaayohan sa nasud.
Dili dautan ang tuyo sa maong lakang, apan usa kini ka pahimangno nga kinahanglan lig-on nga prinsipyo ug tinud-anay nga pagbati ang maggiyahan sa panaghiusa sa matag Pilipino.
Naghinaot ang mga Dabawenyo nga pinaagi sa maong lakang, madungog ang ilang tingog ug masugdan ang matuod nga mga reporma alang sa hustisya ug kausaban.
Dunggag pa nila nga ang maong kalihokan dapat gyud mahimog hinungdanon ug dili na kita magpabuta-bungol sa mga isyu nga naglangkob sa atong nasud.
Sa Rizal Park, Davao City, magsugod ang programa alas-3:00 sa hapon. Lakip sa mga highlight ang panag-ampo para sa kalinaw ug ang panawagan sa pagpagawas sa kanhi Presidente Rodrigo Duterte pabalik sa Davao City. Mahitabo usab ang usa ka “piyesta” nga adunay gatusan ka lechon baka.
Ang tanan nga Pilipino ginaabi-abi sa kalihokan, ug gidasig ang pagsul-ob og berde, itom, o bisan unsang Duterte T-shirt. Gipahimangnoan ang tanang musalmot nga magdala og kaugalingong tubig sa klaro nga tumbler; bawal ang backpack ug jacket; bawal ang solicitation ug donasyon; ug gidasig nga dili dad-on ang mga bata nga 12 anyos paubos alang sa kaluwasan.
Andam ang live streaming para sa mga Pilipino sa tibuok kalibutan, samtang ang mga vlogger welcome nga motambong pinaagi sa accreditation ug ID gikan sa organizer.
Andam na ang City Transport and Traffic Management Office (CTTMO) sa pag-deploy og 30 ka traffic enforcers aron masiguro ang hapsay nga dagan sa trapiko sa Rizal Park ug San Pedro Street. Magsugod ang road closure alas-1:00 sa kaadlawon sa Setyembre 21 ug molungtad hangtod alas-1:00 sa kaadlawon sa Setyembre 22.
Dili tugotan ang mga sakyanan nga molusot sa San Pedro Street gikan sa kanto sa C.M. Recto; imbes, pagadumalahon kini sa Rizal ug Anda, ug kung modaghan ang trapiko, i-redirect ngadto sa Bonifacio, unya sa Anda, balik sa San Pedro.
Giandam usab sa kapulisan ang seguridad.
Sumala ni Angel Sumagaysay, hepe sa Public Safety and Security Office (PSSO), mag-deploy sila og kapin 500 ka personahe ug makig-koordinar sa DCPO aron masiguro ang kalinaw ug kahapsay.
Sa katapusan, gipahinumdoman sa mga nag-organisa ug sa mga Dabawenyo nga ang rally dili usa ka dautang lakang, kondili usa ka lig-on nga pahayag sa katungod sa katawhan nga ipadayag ang ilang tingog alang sa kausaban ug hustisya.
Ang kalihokan gilauman nga mahimong simbolo sa panaghiusa ug kalinaw, diin ang tinuoray nga katuyoan mao ang pagbarug sa kamatuoran ug pagduso sa maayong kaugmaon para sa tanan.
