Gipatin-aw ni DPWH Spokesperson Dean Ortiz nga ang pagkahugno sa Callawa Bridge sa Davao City niadtong miaging adlaw kabahin sa usa ka proyekto sa Department of Public Works and Highways (DPWH) Region XI nga gisugdan pa niadtong 2017.Ang proyekto naglakip sa concreting, widening, ug improvement sa bypass road nga moagi sa mga lugar sa Buhangin, Tigato, Mandug, Callawa, ug Fatima Road, lakip na ang reconstruction sa Callawa Bridge ug Road Right of Way ubos sa Contract ID 17-LO-0133.
Matod ni Ortiz, ang Callawa Bridge adunay gitas-on nga 15 metros ug usa lamang ka component sa mas dakong bypass road project nga adunay kapin 5.65 kilometros nga PCCP pavement works. Iyang gipatin-aw nga ang aktuwal nga gasto sa tulay mao lamang ang ₱6.79 milyon ug dili ₱184 milyon, nga matod niya resulta sa sayop nga interpretasyon sa ubang report.Human sa insidente, gilayon nga naghimo og ocular inspection ang DPWH XI ug nakadesisyon nga magbutang og Bailey Bridge isip temporaryong solusyon aron maibalik ang agianan sa mga motorista ug residente sa maong lugar.
Sa pagkakaron, nagdeploy na ang DPWH XI og mga heavy equipment sama sa backhoe ug mga truck alang sa pag-assemble ug pagtransport sa mga component sa Bailey Bridge. Nagpadayon usab ang mobilization sa Equipment Management Division aron mapaspasan ang pagtukod sa temporaryong tulay.Gibanabana sa ahensya nga sulod sa duha hangtod upat ka semana maibalik ang accessibility sa lugar pinaagi sa Bailey Bridge nga ipahimutang sa Callawa area sa Davao City.
Samtang wala pa mahuman ang rehabilitasyon sa orihinal nga tulay, gisugyot sa DPWH ang alternatibong ruta agi sa Catualan nga adunay gilay-on nga 4.6 kilometros.Gipasalig usab sa DPWH XI nga ilang paspasan ang trabaho aron dali nga mahatagan og luwas ug permanenteng solusyon ang apektadong komunidad ug maibalik ang normal nga biyahe sa maong lugar.
