DAVAO CITY – Magpatawag og tukmang imbestigasyon si Davao City 1st District Rep. Paolo Z. Duterte ngadto sa Department of Transportation mahitungod sa mga kabalayan ug mga lawak nga ilabihang maigo sa ginadusong Mindanao Railway Project ilawom sa House Resolution No. 286, uban ang Benguet lone district Rep. Eric Yap.
Sumala pa ni Congressman Pulong nga nakadawat kini og mga reklamo gikan sa mga lumulupyo sa mga apektadong lugar sa dakbayan nga wala miagi sa tumang pagpanukiduki uban sa mga maigong komunidad atol sa railway project.
Dugang sab sa kongresista nga dunay mga tukmang pamaagi alang sa pagkuha sa right-of-way o expropriation sa mga pribadong propedad sa DOTr ug sa iyang mga contractor, sub-contractor, o uban pang service providers.
Nasuta sab nga adunay pipila ka mga politiko nga nagpahimulos sa mga yuta nga maagian sa mga riles pinaagi sa pagbaligya sa mas mahal nga presyo.
Gipaklaro sab niya nga wala kini nagkontra sa maong proyekto apan mas labaw matud pang kinahanglan masayran ang mga posibleng anomalya nga nagapahinabo sa maong proyekto ug ingon mang pagsusi sa mga balaod mahitungod sa right of way acquisition.
Ang three-phase Mindanao Railway Project naglangkob sa 1,530 ka kilometro nga circumferential ug nagdasig sa mga linya sa riles nga magdugtong sa pipila ka mga lugar sa Mindanao sama sa mga probinsya sa Davao, Iligan City, Cagayan de Oro City, General Santos City, ug Zamboanga.
VIA || Bombo LJ Florendo
