Gipasiugda ni Davao City Councilor Luna Maria Acosta ang mas hugot nga pagpahigayon og aksyon batok sa illegal parking pinaagi sa pagpanukala og Clamping Zone Ordinance.
Tumong niini nga mahatagan og solusyon ang nagkagrabe nga trapiko sa dakbayan pinaagi sa pagtudlo og klaro nga no-parking areas sa downtown ug uban pang lugar nga bug-at ang trapiko.
Kung mosupak sa lagda, ang sakyanan sa naglapas pagakapahimutangan og clamp aron dili kini makabiya hangtod nga bayaran ang multa. Giklaro ni Acosta nga dili maapektuhan sa ordinansa ang pay-parking ug free-parking areas nga gi-designate sa siyudad.
Sa pagkakaron, padayon pang giila ang mga lugar nga mahimong clamping zones sama sa Quimpo Boulevard, R. Castillo Street, ug uban pang dalan nga sagad maghuot ang trapiko.
Ang multa mosaka gikan P1,000 hangtod P3,000 depende sa klase sa sakyanan, ug bayran kini una pa kuhaon ang clamp. Gilauman sa konsehal nga maaprubahan ang ordinansa sa dili pa matapos ang tuig 2025.
Lakip sa panukiduki ang pag-amendar sa traffic code aron tugotan ang City Transport and Traffic Management Office (CTTMO) nga magpatuman sa clamping operations.
Sa karon, nagapadayon na ang proseso sa pagpangandam ug pagpalit sa mga clamp para sa implementasyon.
