Gipalig-on sa City Government of Davao ang paggamit sa electric vehicles (EVs) alang sa ilang opisyal nga fleet isip kabahin sa padayon nga paningkamot padulong sa mas malungtarong transportasyon ug pagkunhod sa pagsalig sa fuel-dependent nga mga sakyanan.
Sumala sa City Information Office, gisugdan ang plano sa pagpalit og EVs niadtong 2025, ug misunod ang procurement process subay sa direktiba sa mayor sa dakbayan.Gibutyag usab nga mokabat sa 54 ka electric vehicles, lakip ang multipurpose vehicles ug disaster response units, ang giplano nga ipasulod sa fleet sa syudad, nga gilauman nga moabot pinaagi sa lain-laing batch sugod karong tuiga.
Gipasiugda sa lokal nga panggamhanan ang paghatag og prayoridad sa electric vehicles imbes sa diesel-powered units isip kabahin sa modernisasyon sa transport system sa dakbayan. Gipadayon sa mga otoridad ang procurement process samtang gihulat ang pag-abot sa mga unit aron masugdan ang implementasyon sa maong programa.
Gitouhan sa lokal nga panggamhanan nga kini nga lakang makatabang sa pagpalambo sa mas limpyo, episyente, ug sustainable nga transportasyon samtang giatubang ang padayon nga pagsaka sa presyo sa petrolyo. Gipahinumduman usab sa mga opisyal nga apil sa dugayng plano sa syudad ang pagpalapad sa charging infrastructure aron masuportahan ang pagdagsa sa electric vehicles sa umaabot.
Gilauman sa City Government nga pinaagi niini nga inisyatiba, mapadasig usab ang ubang sektor ug pribadong indibidwal sa pagsunod sa paggamit og mas environment-friendly nga mga sakyanan. Sa pagkakaron padayon ang ilang monitoring ug evaluation sa programa aron masiguro ang epektibong implementasyon ug dugang nga pagpaayo sa transport system sa dakbayan.
