Giingong nagkalisod na ang Chinese envoy ug ang China sa pag-atubang sa isyu sa West Philippine Sea (WPS) pinaagi sa ilang giingong pagpakaylap og sayop ug peke nga impormasyon.
Kini sumala pa ni Philippine Coast Guard Spokesperson for the WPS Rear Admiral Jay Tarriela.
Sunod-sunod na kuno ang mga pahayag gikan sa Chinese Embassy sa Manila nga iyang giingong kabahin sa usa ka kampanya sa disinformation aron mapaligon ang ilang posisyon sa gilalisang kadagatan.
Dugang pa niini, gibalik ni Tarriela ang iyang kritisismo batok sa mga pahayag nila Chinese Ambassador to the Philippines Jing Quan ug Deputy Spokesperson sa Chinese Embassy Guo Wei, nga iyang giingong misaway kaniya isip usa sa pinakakusgan nga tingog sa Pilipinas sa isyu sa WPS.
Matud pa ni Tarriela, gisgutan sa maong mga opisyal ang iyang paggamit kaniadto og mga satirical images ug giangkon nga kini usa ka pag-insulto kang Chinese President Xi Jinping.
Apan gipahayag ni Tarriela nga ang maong mga imahe dili ikatandi, matud pa niya, sa mga aksyon sa China nga iyang giingong pagpang-angkon sa mga teritoryo sa Pilipinas sa WPS ug uban pang insidente sa pagpangharas batok sa mga Pilipino.
Samtang, may kalabotan sa iyang diskusyon kang Senador Robin Padilla kabahin sa kontrobersyal nga racist video nga gipagawas sa Chinese state media, giingon ni Tarriela nga wala sila personal nga panagbangi sa senador.
Matud pa sa opisyal, iyang gikuwestyon ang pahayag ni Padilla kabahin sa maong video tungod kay, sumala niya, dili kini angay nga pahayag atol sa sensitibong isyu sa West Philippine Sea.
Sa kasamtangan, naglaum si Tarriela nga nasabtan ni Padilla ang iyang posisyon human sa paghatag og mga pasabot, samtang nagpadayon ang diskusyon tali sa Pilipinas ug China kabahin sa nagpadayon nga isyu sa West Philippine Sea.
