Mipatuman ang China og bag-ong mga sanctions batok sa pipila ka mga kompanya sa Estados Unidos isip balos sa mga silot nga unang gipahamtang sa Washington batok sa mga produktong Chinese.
Sumala pa sa Chinese Ministry of Commerce, lakip sa gipahamtangan og sanctions ang pipila ka biotech ug resource analytics firms sa Estados Unidos.
Dugang pa niini, gipahugtan usab sa Beijing ang export controls sa mga drones, mga piyesa niini, ug pipila ka mga teknolohiya isip kabahin sa ilang countermeasures.
Kahinumduman, unom ka mga kompanya sa Estados Unidos ang gidugang sa listahan sa China sa mga gipahamtangan og silot isip tubag sa mga lakang sa Washington.
Una nang gidid-an sa Estados Unidos ang 43 ka mga kompanyang Chinese sa pagsulod sa merkado niini tungod sa mga alegasyon sa human rights abuses batok sa Uyghur ug uban pang minority groups.
Sa pagkakaron, nagpadayon ang tensiyon tali sa China ug Estados Unidos sa natad sa pamatigayon ug diplomasya.
Gilauman usab nga mahimong usa sa mga hisgutan ang maong isyu atol sa gitakdang pagbisita ni Chinese President Xi Jinping sa Estados Unidos sa sunod bulan, diin gilauman usab ang iyang pakigtagbo kang US President Donald Trump.
