Nanawagan ang Cathlic Bishops’ Conference of the Philippines (CBCP) sa mga Pilipino nga ipadayon ang pag-ampo, pag-donar, ug boluntaryong pagtabang alang sa mga komunidad nga apektado sa bag-ohay nga mga linog ug bagyong Tino.
Sumala sa CBCP, liboan ka mga pamilya ang nawad-an sa ilahang mga panimalay ug daghang lugar ang nanginahanglan og hinanaling tabang.
Gibutyag sa simbahan ang kamahinungdanon sa pagkahiusa ug pagpakabana samtang nagpadayon ang mga operasyon sa pagtabang o relief operations.
Sa laing bahin, ang ilahang national network nag-koordinar usab sa mga diocesan social action centers, mga civil society groups, ug mga lokal nga boluntaryo aron mahatod ang hinabang ngadto sa mga apektadong komunidad.
Giawhag usab sa CBCP ang mga parokya ug mga donor nga ipadayon ang ilahang suporta samtang nagkadako ang panginahanglan alang sa relief ug early recovery.
Kahinumduman nga sa miaging mga semana, nakasinati sa kusog nga mga linog ang Cebu, Davao Oriental, La Union, Surigao del Sur, ug Zambales.
Dugang pa niini, naigo pag-usab ang Cebu niadtong Nobyembre 4 sa bagyo, nga hinungdan sa grabe nga pagbaha.
Ang maong bagyo usab miigo sa ubang mga lalawigan sa Visayas, nga nakamugna og labaw sa usa ka gatos ka pagkahanaw sa kinabuhi ug pagbakwit sa liboan ka mga residente.
