Gibatikos ni Senador Erwin Tulfo ang giingong padayon nga paglapas sa pipila ka negosyante sa gipatuman nga price freeze, ug nanawagan sa Department of Trade and Industry (DTI) nga maglunsad og aktwal nga inspeksyon sa mga merkado aron maprotektahan ang mga konsyumer.
Sumala pa sa DTI, gipatuman ang price freeze hangtod Mayo 10 isip tubag sa pagsaka sa presyo sa produktong petrolyo ug epekto sa tensyon sa Tungang Sidlakan. Apan, dugang pa niini, miingon si Tulfo nga adunay mga report nga wala kini masunod, ilabi na sa gagmayng tindahan ug lokal nga mga merkado. Matud pa sa senador, adunay pipila ka negosyante nga naga-abuso sa kakulang sa hugot nga monitoring, lakip na sa mga lugar nga dili dayon maabot sa inspeksyon sa gobyerno.
Dugang pa niya, ang mga konsyumer nga nagsalig sa gagmayng tindahan mao ang pinakaapektado, tungod kay limitado ang ilang kapilian sa pagpalit sa mga batakang panginahanglan. Gipahayag pa niya nga dili igo ang pagsalig lamang sa mga report ug dokumento, hinungdan nga kinahanglan pa palig-onon sa DTI ang ilang presensya sa mga merkado pinaagi sa on-ground inspection.
Sa kasamtangan, gipunting sa senador nga mawagtangan og bili ang mga programang ayuda kung dili mapugngan ang manipulasyon sa presyo sa mga palaliton. Sa pagkakaron, sumala pa sa balaod, ang mosupak sa price freeze mahimong atubangon ang kasong administratibo, multa, ug posibleng pagkakulong depende sa kabug-at sa paglapas.
